«Tottenxem» futbolchisi Xavi Simons xochsimon bog‘lamlari uzilishi tufayli safdan chiqdi. Niderlandiyalik yarim himoyachi shanba kuni Premyer-liga doirasida «Vulverxempton»ga qarshi kechgan bahsda jarohat oldi. Futbolchi mavsumning qolgan qismini va bo‘lajak Jahon chempionatini o‘tkazib yuboradi — katta ehtimol bilan u maydonga faqat keyingi yili qayta oladi.

«Hayot ba’zan shafqatsiz bo‘ladi, deyishadi va hozir men buni his qilyapman. Mavsumim kutilmaganda yakuniga yetdi, men hali ham buni hazm qilishga harakat qilyapman. Rostini aytsam, ruhan ezilganman. Hamma narsa o‘z ma’nosini yo‘qotgandek tuyulmoqda. Yagona istagim — jamoa uchun kurashish edi, lekin endi men bu imkoniyatdan ham, Jahon chempionatida o‘ynash baxtidan ham mahrum bo‘ldim», — deya jurnalist Ben Jeykobs Simonsning so‘zlarini keltirmoqda.

Eslatib o‘tamiz, joriy mavsum Xavi uchun «Tottenxem»dagi debyut mavsum hisoblanadi. O‘tgan yozda u «RB Leypsig»dan «shporlar» safiga kelib qo‘shilgan edi.