«Liverpul» jamoasining tajribali posboni Alisson Beker joriy mavsum yakunida mersisaydliklar safini tark etishi mumkin. Unga Turinning «Yuventus» klubi jiddiy qiziqish bildirmoqda.
TEAMtalk nashri bergan ma’lumotlarga ko‘ra, braziliyalik golkiper uchun Turinga ko‘chib o‘tish varianti ma’qul kelmoqda va u ushbu transferga tobora ko‘proq moyillik bildirmoqda. Italiya grandi allaqachon 33 yoshli darvozabonga «2+1» ko‘rinishidagi shartnoma taklif qilgan.
Alisson uchun Italiya futboli begona emas. U 2018 yilda «Liverpul»ga o‘tishdan oldin «Roma» sharafini himoya qilgan. Tajribali futbolchining ingliz klubi bilan amaldagi shartnomasi 2027 yilning yoziga qadar mo‘ljallangan.
Ma’lumot uchun, Transfermarkt portali Alisson Bekerning bozor qiymatini 17 million yevroga baholamoqda.
