«PSJ»ning gruziyalik vingeri Xvicha Kvarasxeliya Chempionlar ligasi yarim finali doirasidagi «Bavariya»ga qarshi o‘yin oldidan o‘tkazilgan matbuot anjumanida o‘zining asosiy uslubiga aylangan harakatlari haqida to‘xtalib o‘tdi.
«Men dribling va zarbalar ustida juda ko‘p ishlayman. Maydon markaziga yorib kirib, zarba berishim — bu shunchaki tasodif emas, balki tinimsiz mashg‘ulotlar natijasidir. Men bu harakatni mashqlarda har kuni takrorlayman va o‘z ustimda ishlashdan to‘xtamayman», — deya Xvichaning so‘zlarini keltiradi UEFA rasmiy sayti.
Shuningdek, futbolchi o‘z fintlari va sevimli usullaridan foydalanish ko‘p jihatdan raqib himoyachilarining harakatlariga ham bog‘liq ekanini ta’kidlab o‘tdi. Eslatib o‘tamiz, «PSJ» va «Bavariya» o‘rtasidagi ilk to‘qnashuv bugun, 28 aprel oqshomida bo‘lib o‘tadi.
