«ПСЖ»нинг грузиялик вингери Хвича Кварацхелия Чемпионлар лигаси ярим финали доирасидаги «Бавария»га қарши ўйин олдидан ўтказилган матбуот анжуманида ўзининг асосий услубига айланган ҳаракатлари ҳақида тўхталиб ўтди.

«Мен дриблинг ва зарбалар устида жуда кўп ишлайман. Майдон марказига ёриб кириб, зарба беришим — бу шунчаки тасодиф эмас, балки тинимсиз машғулотлар натижасидир. Мен бу ҳаракатни машқларда ҳар куни такрорлайман ва ўз устимда ишлашдан тўхтамайман», — дея Хвичанинг сўзларини келтиради УЕФА расмий сайти.

Шунингдек, футболчи ўз финтлари ва севимли усулларидан фойдаланиш кўп жиҳатдан рақиб ҳимоячиларининг ҳаракатларига ҳам боғлиқ эканини таъкидлаб ўтди. Эслатиб ўтамиз, «ПСЖ» ва «Бавария» ўртасидаги илк тўқнашув бугун, 28 апрель оқшомида бўлиб ўтади.