«Manchester Siti»ning Angliya Kubogi finaliga chiqqani shuni anglatadiki, jamoaning Premyer-liga doirasidagi «Bornmut»ga qarshi safar o‘yini boshqa muddatga ko‘chirilishi kerak. Shu tariqa, «shaharliklar»da ikkita qoldirilgan o‘yin yuzaga keldi — bundan avval Liga Kubogi finali sababli Xosep Gvardiola jamoasining «Kristal Pelas»ga qarshi o‘z maydonidagi bahsi qoldirilgan edi.

Ushbu o‘yinlarni «Manchester Siti» hafta o‘rtalarida — 13 va 19 may kunlari o‘tkazishiga to‘g‘ri keladi. Dastlabki rejaga ko‘ra, 13 may kuni «Manchester Siti» o‘z uyida «Kristal Pelas»ni qabul qilishi, 19 mayda esa safarda «Bornmut» bilan o‘ynashi kerak edi. 16 may kuni esa Gvardiola shogirdlari Angliya Kubogi finalida «Chelsi»ga qarshi maydonga tushishadi.

Business Upturn nashrining xabar berishicha, «Manchester Siti» chempionatning qoldirilgan o‘yinlari tartibini o‘zgartirishni so‘ragan, biroq APL rahbariyati bu iltimosni rad etgan.