«Манчестер Сити»нинг Англия Кубоги финалига чиққани шуни англатадики, жамоанинг Премьер-лига доирасидаги «Борнмут»га қарши сафар ўйини бошқа муддатга кўчирилиши керак. Шу тариқа, «шаҳарликлар»да иккита қолдирилган ўйин юзага келди — бундан аввал Лига Кубоги финали сабабли Хосеп Гвардиола жамоасининг «Кристал Пэлас»га қарши ўз майдонидаги баҳси қолдирилган эди.
Ушбу ўйинларни «Манчестер Сити» ҳафта ўрталарида — 13 ва 19 май кунлари ўтказишига тўғри келади. Дастлабки режага кўра, 13 май куни «Манчестер Сити» ўз уйида «Кристал Пэлас»ни қабул қилиши, 19 майда эса сафарда «Борнмут» билан ўйнаши керак эди. 16 май куни эса Гвардиола шогирдлари Англия Кубоги финалида «Челси»га қарши майдонга тушишади.
Business Upturn нашрининг хабар беришича, «Манчестер Сити» чемпионатнинг қолдирилган ўйинлари тартибини ўзгартиришни сўраган, бироқ АПЛ раҳбарияти бу илтимосни рад этган.
