Madridning «Real» klubi va Braziliya terma jamoasi himoyachisi Eder Militao AQSH, Meksika va Kanada mezbonlik qiladigan Jahon chempionatida ishtirok eta olmaydi. Bu haqda taniqli insayder Fabrisio Romano «qaymoqranglilar» murabbiylar shtabining qaroriga tayanib xabar bermoqda.
Manbaning bergan ma’lumotiga ko‘ra, Militao bugun Finlyandiyada operasiya qilinadi. Braziliyalik futbolchi faqat oktyabr oyiga borib safga qaytishi mumkin.
Bu Militao uchun joriy mavsumdagi to‘rtinchi jarohatdir. 2025/2026 yilgi mavsumda u salomatligidagi turli muammolar tufayli 27 ta o‘yinni o‘tkazib yubordi.
Ta’kidlash joizki, JCH-2026 guruh bosqichida Braziliya terma jamoasi Marokash, Gaiti va Shotlandiya milliy jamoalari bilan kurash olib boradi.













