«Bavariya» ustozi Vensan Kompani Chempionlar Ligasi yarim finali doirasida «PSJ»ga qarshi kechgan dastlabki o‘yinda (4:5) vinger Maykl Olisening ko‘rsatgan o‘yini haqidagi savolga javob berdi. 24 yoshli fransuz myunxenliklarning parijliklar darvozasiga yo‘llagan to‘rtta golidan biriga mualliflik qildi — u 41-daqiqada hisobni 2:2 ko‘rinishiga keltirgan edi.

«Chempionlar Ligasi yarim finallari shuni ko‘rsatadiki, eng yaxshi futbolchilar hal qiluvchi pallada doim o‘zlarining bor imkoniyatlarini namoyish etishadi va kurashishdan to‘xtashmaydi. Maykl hayratlanarli darajada ajoyib o‘yin ko‘rsatdi, lekin biz asosiy maqsadimizga erishishimiz, ya’ni finalga chiqishimiz kerak», — dedi Kompani matbuot anjumanida.

Maykl Olise Chempionlar Ligasining joriy mavsumidagi 12 ta uchrashuvda o‘z hisobiga jami 5 ta gol va 7 ta golli uzatmani yozdirib qo‘ydi.