Seshanba kuni «PSJ» o‘z maydonida Chempionlar ligasining ilk yarim finalida «Bavariya»ni 5:4 hisobida mag‘lub etdi. Qarama-qarshilik g‘olibi 6 may kuni Myunxenda aniqlanadi.
O‘yindan keyingi matbuot anjumanida jurnalistlar Luis Enrikedan kelgusi chorshanba kuni final yo‘llanmasini qo‘lga kiritish uchun uning jamoasidan nima talab qilinishi haqida so‘rashdi.
«Men o‘z murabbiylar shtabimdan ["Alyans Arena"da] nechta gol urishimiz kerakligini so‘radim va biz uchta gol degan xulosaga keldik. Ushbu stadion bilan bog‘liq ko‘plab baxtli xotiralarim bor. "Bavariya" o‘z muxlislari qarshisida o‘ynaydi, lekin biz maydonga xuddi bugungidek kayfiyat bilan tushamiz. Biz Myunxenga g‘alaba uchun boramiz», — deya parijliklar bosh murabbiyining so‘zlarini keltirmoqda UEFA.
Eslatib o‘tamiz, o‘tgan mavsumda «PSJ» Chempionlar ligasi g‘olibiga aylangan edi.
