Сешанба куни «ПСЖ» ўз майдонида Чемпионлар лигасининг илк ярим финалида «Бавария»ни 5:4 ҳисобида мағлуб этди. Қарама-қаршилик ғолиби 6 май куни Мюнхенда аниқланади.
Ўйиндан кейинги матбуот анжуманида журналистлар Луис Энрикедан келгуси чоршанба куни финал йўлланмасини қўлга киритиш учун унинг жамоасидан нима талаб қилиниши ҳақида сўрашди.
«Мен ўз мураббийлар штабимдан ["Альянц Арена"да] нечта гол уришимиз кераклигини сўрадим ва биз учта гол деган хулосага келдик. Ушбу стадион билан боғлиқ кўплаб бахтли хотираларим бор. "Бавария" ўз мухлислари қаршисида ўйнайди, лекин биз майдонга худди бугунгидек кайфият билан тушамиз. Биз Мюнхенга ғалаба учун борамиз», — дея парижликлар бош мураббийининг сўзларини келтирмоқда УEФА.
Эслатиб ўтамиз, ўтган мавсумда «ПСЖ» Чемпионлар лигаси ғолибига айланган эди.
