«Kristal Pelas» futbolchisi Ismaila Sarr Konferensiyalar ligasida yangi rekord o‘rnatdi. Senegallik futbolchi «Shaxtyor»ga qarshi kechgan yarim final bahsining 21-soniyasidayoq hisobni ochishga muvaffaq bo‘ldi. Opta ma’lumotlariga ko‘ra, bu turnir tarixidagi eng tezkor gol sifatida qayd etildi. Uchrashuv London jamoasining 3:1 hisobidagi g‘alabasi bilan yakunlandi.
«Kristal Pelas» va «Shaxtyor» o‘rtasidagi javob o‘yini kelasi payshanba, 7 may kuni bo‘lib o‘tadi. Nufuzi jihatidan uchinchi o‘rinda turuvchi yevrokubok finalining ikkinchi yo‘llanmasi uchun «Rayo Valyekano» va «Strasbur» jamoalari kurash olib bormoqda. Ular o‘rtasidagi ilk bahs madridliklarning kichik hisobdagi g‘alabasi bilan tugagan. Turnirning hal qiluvchi final uchrashuvi 27 may kuni Leypsig shahrida bo‘lib o‘tadi.
