«Barselona» bosh murabbiyi Xansi Flik Robert Levandovskining jamoadagi kelajagi haqidagi savolga aniq javob berishdan qochdi. 2 may kuni bo‘lib o‘tadigan «Osasuna»ga qarshi o‘yin oldidan o‘tkazilgan matbuot anjumanida u futbolchi bilan bu borada suhbatlashib olganini tan oldi.

Xabarlarga ko‘ra, «Barselona» 37 yoshli polshalik hujumchiga shartnomani uzaytirishni taklif qilgan, biroq shunga qaramay, Levandovski kelayotgan yozda jamoani tark etishi mumkin.

«Albatta, biz bu haqda gaplashdik, lekin bu suhbat oramizda qoladi. Hozirda biz bor e’tiborimizni qolgan beshta o‘yinga qaratganmiz. Mavsum yakunlangach, hamma bilan gaplashib olamiz va nima bo‘lishini ko‘ramiz», — deya Flikning so‘zlarini keltirmoqda Barca Universal.

Joriy mavsumda Levandovski klub miqyosida 41 ta o‘yinda maydonga tushib, 17 ta gol urdi va 4 ta golli uzatmani amalga oshirdi.