«Барселона» бош мураббийи Ханси Флик Роберт Левандовскининг жамоадаги келажаги ҳақидаги саволга аниқ жавоб беришдан қочди. 2 май куни бўлиб ўтадиган «Осасуна»га қарши ўйин олдидан ўтказилган матбуот анжуманида у футболчи билан бу борада суҳбатлашиб олганини тан олди.

Хабарларга кўра, «Барселона» 37 ёшли польшалик ҳужумчига шартномани узайтиришни таклиф қилган, бироқ шунга қарамай, Левандовски келаётган ёзда жамоани тарк этиши мумкин.

«Албатта, биз бу ҳақда гаплашдик, лекин бу суҳбат орамизда қолади. Ҳозирда биз бор эътиборимизни қолган бешта ўйинга қаратганмиз. Мавсум якунлангач, ҳамма билан гаплашиб оламиз ва нима бўлишини кўрамиз», — дея Фликнинг сўзларини келтирмоқда Barca Universal.

Жорий мавсумда Левандовски клуб миқёсида 41 та ўйинда майдонга тушиб, 17 та гол урди ва 4 та голли узатмани амалга оширди.