Hozirda ijara asosida «Lion»da to‘p tepayotgan hujumchi Endrik Madridning «Real» klubida o‘zini ko‘rsatish uchun yangi imkoniyatga ega bo‘ladi. 19 yoshli braziliyalik futbolchi «qaymoqranglilar»ning asosiy tarkibiga kira olmagach, yanvar oyida o‘yin amaliyotiga ega bo‘lish uchun Fransiyaga yo‘l olgan edi.

Insayder Fabrisio Romano bergan ma’lumotlarga ko‘ra, «qirollik klubi» yangi mavsumda Endrikni tarkibga qaytarishni rejalashtirmoqda. Braziliyalik futbolchining o‘zi ham Madridga qaytishni istaydi.

Biroq ko‘p narsa hali tanlanmagan yangi murabbiyning qaroriga yoki agar lavozimida qoldirilsa, Alvaro Arbeloaga bog‘liq bo‘ladi. Shuningdek, agar Endrik kelayotgan yozda jamoada qolsa, hujumchi Gonsalo Garsiya «Real»dan ketishi mumkinligi qayd etilgan.