Ҳозирда ижара асосида «Лион»да тўп тепаётган ҳужумчи Эндрик Мадриднинг «Реал» клубида ўзини кўрсатиш учун янги имкониятга эга бўлади. 19 ёшли бразилиялик футболчи «қаймоқранглилар»нинг асосий таркибига кира олмагач, январь ойида ўйин амалиётига эга бўлиш учун Францияга йўл олган эди.
Инсайдер Фабрицио Романо берган маълумотларга кўра, «қироллик клуби» янги мавсумда Эндрикни таркибга қайтаришни режалаштирмоқда. Бразилиялик футболчининг ўзи ҳам Мадридга қайтишни истайди.
Бироқ кўп нарса ҳали танланмаган янги мураббийнинг қарорига ёки агар лавозимида қолдирилса, Альваро Арбелоага боғлиқ бўлади. Шунингдек, агар Эндрик келаётган ёзда жамоада қолса, ҳужумчи Гонсало Гарсия «Реал»дан кетиши мумкинлиги қайд этилган.
