«Chelsi» klubi 2026/27 yilgi mavsumda o‘z formasida klublar o‘rtasidagi Jahon chempionati g‘olibi emblemasini qoldirish bo‘yicha Premyer-ligaga so‘rov yubordi. Bu haqda «The Telegraph» nashri xabar bermoqda.
Londonliklar o‘tgan yilning iyul oyida KJCH finalida «PSJ»ni 3:0 hisobida mag‘lub etishgan edi. Joriy mavsumda jamoa ushbu belgi bilan o‘yinlarda ishtirok etmoqda. FIFA qoidalariga ko‘ra, yirik turnir g‘oliblariga keyingi musobaqagacha, ya’ni to‘rt yil davomida ushbu emblemadan foydalanish huquqi berilishi mumkin.
Biroq, emblemani formaga joylashtirish dizaynda ma’lum qiyinchiliklar tug‘diradi. U klub logotipi va «Nike» belgisi orasidagi cheklangan joyga o‘rnatilishi kerak. Hozirda APLda 8-o‘rinda borayotgan «Chelsi» uchun bu ramz Jahon chempioni maqomini ifodalovchi muhim detal hisoblanadi.
