Lionel Messining harakatlari «Inter Mayami»ni MLS doirasidagi «Orlando Siti»ga qarshi o‘yinda (3:4) mag‘lubiyatdan qutqarib qola olmadi. 38 yoshli hujumchi 25-daqiqada golli uzatmani amalga oshirgan bo‘lsa, 34-daqiqada o‘zi gol urib, jamoasining ustunligini yirik hisobga (3:0) yetkazdi. Biroq ko‘p o‘tmay raqiblar bitta javob to‘pini kiritishdi, ikkinchi bo‘limda esa yana uch bor gol urib, g‘alabani ilib ketishdi.
Mashhur statistik portal — SofaScore Messining mazkur o‘yindagi ishtirokini eng yuqori ball – 10 bilan baholadi. Yuqorida ta’kidlangan samarali harakatlardan tashqari, argentinalik yulduz eng ko‘p muvaffaqiyatli aldamchi harakatlar (6 ta), xavfli uzatmalar (4 ta) va yaqqol golli vaziyatlar yaratish (2 ta) bo‘yicha ham eng yaxshi ko‘rsatkichni qayd etdi. Lionel uchun bu o‘tgan yilning noyabr oyidan beri qo‘lga kiritilgan ilk «o‘ntalik» ball bo‘ldi.
