Лионель Мессининг ҳаракатлари «Интер Майами»ни МЛС доирасидаги «Орландо Сити»га қарши ўйинда (3:4) мағлубиятдан қутқариб қола олмади. 38 ёшли ҳужумчи 25-дақиқада голли узатмани амалга оширган бўлса, 34-дақиқада ўзи гол уриб, жамоасининг устунлигини йирик ҳисобга (3:0) етказди. Бироқ кўп ўтмай рақиблар битта жавоб тўпини киритишди, иккинчи бўлимда эса яна уч бор гол уриб, ғалабани илиб кетишди.

Машҳур статистик портал — SofaScore Мессининг мазкур ўйиндаги иштирокини энг юқори балл – 10 билан баҳолади. Юқорида таъкидланган самарали ҳаракатлардан ташқари, аргентиналик юлдуз энг кўп муваффақиятли алдамчи ҳаракатлар (6 та), хавфли узатмалар (4 та) ва яққол голли вазиятлар яратиш (2 та) бўйича ҳам энг яхши кўрсаткични қайд этди. Лионель учун бу ўтган йилнинг ноябрь ойидан бери қўлга киритилган илк «ўнталик» балл бўлди.