«Bavariya» bosh murabbiyi Vensan Kompani jamoasi o‘tkazayotgan gollar soni ortib borayotgani haqidagi fikrlari bilan o‘rtoqlashdi. Shanba kuni myunxenliklar Bundesliga doirasidagi «Xaydenxaym»ga qarshi o‘z maydonlarida kechgan bahsning so‘nggi daqiqalarida durangni (3:3) ilib ketishdi. Bungacha jamoa «PSJ»dan beshta (4:5) va «Mayns»dan uchta (4:3) gol o‘tkazib yuborgan edi.
Jurnalistlar Kompanidan bunday ko‘rsatkichlar uni xavotirga solyaptimi yoki yo‘qligi haqida so‘rashdi.
«Men himoyachi bo‘lganman va ko‘p gol o‘tkazib yuborish nima ekanligini yaxshi bilaman. Biz o‘tgan yili ham bu mavzuni muhokama qilgandik — o‘sha suhbatlardan so‘ng, adashmasam, ketma-ket sakkizta o‘yinni «quruq» o‘tkazgandik. Eng muhimi — xotirjamlikni saqlash. Jamoamiz qiyinchiliklarga to‘g‘ri munosabat bildira olishini doimo isbotlab kelgan, endi buni yana bir bor amalga oshirish kerak. O‘yinchilar reaksiya ko‘rsatishlari lozim va buning uchun chorshanba kuni «PSJ»ga qarshi bo‘ladigan bahs eng yaxshi imkoniyatdir», — deya Kompanining so‘zlarini keltirmoqda Bayern & Germany.
6 may kuni «Alyans Arena»da parijliklarga qarshi Chempionlar ligasi yarim finalining javob uchrashuvi bo‘lib o‘tadi.
