«Бавария» бош мураббийи Венсан Компани жамоаси ўтказаётган голлар сони ортиб бораётгани ҳақидаги фикрлари билан ўртоқлашди. Шанба куни мюнхенликлар Бундеслига доирасидаги «Хайденхайм»га қарши ўз майдонларида кечган баҳснинг сўнгги дақиқаларида дурангни (3:3) илиб кетишди. Бунгача жамоа «ПСЖ»дан бешта (4:5) ва «Майнц»дан учта (4:3) гол ўтказиб юборган эди.

Журналистлар Компанидан бундай кўрсаткичлар уни хавотирга соляптими ёки йўқлиги ҳақида сўрашди.

«Мен ҳимоячи бўлганман ва кўп гол ўтказиб юбориш нима эканлигини яхши биламан. Биз ўтган йили ҳам бу мавзуни муҳокама қилгандик — ўша суҳбатлардан сўнг, адашмасам, кетма-кет саккизта ўйинни «қуруқ» ўтказгандик. Энг муҳими — хотиржамликни сақлаш. Жамоамиз қийинчиликларга тўғри муносабат билдира олишини доимо исботлаб келган, энди буни яна бир бор амалга ошириш керак. Ўйинчилар реакция кўрсатишлари лозим ва бунинг учун чоршанба куни «ПСЖ»га қарши бўладиган баҳс энг яхши имкониятдир», — дея Компанининг сўзларини келтирмоқда Bayern & Germany.

6 май куни «Альянц Арена»да парижликларга қарши Чемпионлар лигаси ярим финалининг жавоб учрашуви бўлиб ўтади.