«Chelsi» klubi «Milan» himoyachisi Straxinya Pavlovichni sotib olishga qiziqish bildirmoqda. Calciomercato nashri bergan ma’lumotlarga ko‘ra, London klubi futbolchining oxirgi o‘yinlarini diqqat bilan kuzatib bormoqda. «Ko‘klar» yaqin haftalar ichida o‘yinchining transferi bo‘yicha taklif yuborish niyatida.

O‘z navbatida, «Milan» rahbariyati jamoani qayta qurishni rejalashtirgan va «Chelsi» himoyachisi Benua Badyashil nomzodini ko‘rib chiqmoqda. Shu tariqa, klublar futbolchilarni o‘zaro almashtirishlari mumkin.

Straxinya Pavlovich 2024 yilda «RB Zalsburg»dan 18 million yevro evaziga «Milan»ga o‘tgan edi. Uning shartnomasi 2028 yilning 30 iyuniga qadar mo‘ljallangan. Joriy mavsumda himoyachi barcha turnirlarda 34 ta o‘yinda maydonga tushib, 4 ta gol urdi va 1 ta golli uzatmani amalga oshirdi.