Yosh iste’dod egasi Jorti Mokio xalqaro maydonda Kongo  Demokratik Respublikasi milliy terma jamoasi sharafini himoya qilishga qaror qildi.

Transferlar bo‘yicha mutaxassis Sasha Tavolyeri ma’lumotiga ko‘ra, iqtidorli «Ayaks» yosh yulduzi Belgiya yoshlar terma jamoasidan voz kechib, o‘zining ajdodlari ildizlariga ega mamlakat — Kongo DRni tanladi.

Kongolik ota-onadan Belgiyada tug‘ilgan Mokio avval Belgiya U-21 terma jamoasida o‘ynagan, u yerda 6 ta uchrashuvda ishtirok etib, 2 ta gol urgan. Biroq endi yarim himoyachi kattalar darajasidagi xalqaro faoliyatini Kongo bilan bog‘lashni ma’qul ko‘rdi va joriy yozda bo‘lib o‘tadigan Jahon chempionatida «Leopardlar» safida ishtirok etishni maqsad qilgan.

Kongo DR terma jamoasi qit’alararo pley-off orqali JCH yo‘llanmasini qo‘lga kiritdi — ular Boliviya terma jamoasini mag‘lub etdi va endi "K" guruhida quyidagi jamoalarga qarshi maydonga tushadi:

Portugaliya terma jamoasi
O‘zbekiston terma jamoasi
Kolumbiya terma jamoasi

O‘smir futbolchi faoliyatini «Gent» akademiyasida boshlagan va 2024 yilda «Ayaks» akademiyasiga ko‘chib o‘tgan. Yoshlar jamoasida atigi bir mavsum o‘tkazganidan so‘ng, o‘tgan yozda asosiy tarkibga jalb qilindi va tez orada «Ayaks»ning doimiy asosiy o‘yinchilaridan biriga aylandi.

Joriy mavsumda Mokio barcha musobaqalarda 34 ta o‘yinda maydonga tushib, 4 ta gol va 3 ta assist qayd etdi.