«Tottenxem» sobiq bosh murabbiyi Xarri Rednapp Londonning «Arsenal» klubi chempionlik uchun ajoyib imkoniyatga ega deb hisoblaydi. Hozirda jamoa 6 ochkolik farq bilan peshqadamlik qilmoqda, biroq «Manchester Siti»da zaxirada 2 ta o‘yin bor.
Rednapp «kanonirlar»ning qolgan uchrashuvlari haqida to‘xtalib o‘tdi. U «Vest Xem» bilan o‘yin borasida xavotir bildirgan bo‘lsa-da, motivasiyasini yo‘qotgan «Byornli»ga qarshi bahsdagi muvaffaqiyatga shubha qilmayapti.
«Agar «Arsenal» ularni 3:0 yoki 4:0 hisobida mag‘lub etib, to‘plar nisbatini yaxshilab olmasa, hayron qolaman. Agar hammasi to‘plar farqiga bog‘liq bo‘lib qolsa, taqvim ularga katta ustunlik beradi. Agar «Arsenal» qolgan barcha o‘yinlarida g‘alaba qozonsa, menimcha, ular chempion bo‘ladi. Hatto «Siti» ham barcha o‘yinlarini yutgan taqdirda ham», — deya Rednappning so‘zlarini keltiradi Daily Mail.
Mamlakat chempionatidan tashqari, «Manchester Siti»ni Angliya Kubogi finalida «Chelsi»ga qarshi o‘yin kutmoqda, «Arsenal» esa Chempionlar Ligasida kamida yana bitta bahsda (Madridning «Atletiko»siga qarshi) maydonga tushadi.
