Magnus Karlsen va Nodirbek Abdusattorov o‘rtasidagi 3-tur bahsi durang bilan yakunlandi. O‘yindan so‘ng hamyurtimiz uchrashuv tafsilotlari va Magnusning “psixologik o‘yinlari” haqida gapirib berdi.

Nodirbek o‘yinni shunday ta’rifladi:

“Bu juda yuqori sifatli partiya bo‘ldi. Balki tomoshabop bo‘lmagandir, lekin juda mustahkam o‘ynadik. Magnus debyutda kutilmagan Qc2 yurishi bilan meni hayron qoldirdi. Ochig‘ini aytsam, o‘yin biroz sokin va zerikarli kechdi, biroq elita darajasidagi shaxmat kurashi mana shunday bo‘ladi.”

Turnirning qiziq nuqtasi Magnus Karlsenning o‘yinga deyarli o‘n daqiqa kechikib kelgani bo‘ldi. Nodirbek bunga xotirjam munosabat bildirdi:

“U menga qarshi o‘ynaganda doim shunday qiladi. Vayzenxausda ham tur boshlanib bo‘lganidan keyin kelgan edi. Lekin bu meni zarracha ham hayajonga solmay qo‘ygan. Uning odatlarini, narsalarga bo‘lgan munosabatini yaxshi bilaman. Bu uning tanlovi, bunday odatlariga shunchaki e’tibor bermayman.”

Nodirbek hozirgi sport formasi haqida gapirar ekan, kechagi o‘yindagi xatosini eslab o‘tdi:

“O‘zimni yaxshi his qilyapman, lekin kechagi o‘yin meni hali ham qiynayapti. Kamida ikki marta yutuqli pozisiyaga chiqib, g‘alabani qo‘ldan chiqardim. Rxf7 yurishi barcha ustunligimni yo‘qqa chiqardi. Bor-yo‘g‘i 7 ta turdan iborat turnirda bunday imkoniyatlardan foydalana olmaslik juda alamli.”

4-tur bahslari bugun 18:00 da boshlanadi.