«Manchester Siti» bosh murabbiyi Xosep Gvardiola Premyer-liga chempionlik poygasi avjiga chiqqan paytda o‘zini qanday his qilayotgani haqida gapirib berdi. «Shaharliklar» ayni damda «Arsenal»dan olti ochko ortda qolmoqda, biroq «kanonirlar» ikkita ko‘proq o‘yin o‘tkazishgan. Bugun «Siti» safarda «Everton» mehmoni bo‘ladi.
«Hozir o‘yinlarga tayyorgarlik jarayonida o‘zimni o‘tgan mavsumdagiga qaraganda ancha xotirjam his qilyapman. Bir yil oldin kuniga 24 soat davomida Chempionlar ligasiga yo‘llanma ololmasak nima bo‘lishi haqida o‘ylardim. Bu menga juda qattiq ta’sir qilgandi. Quyi ligaga tushib ketadigan jamoalarga qanchalik qiyinligini tasavvur qila olaman, chunki bu klubning moliyaviy holati va boshqa ko‘plab omillariga bevosita ta’sir qiladi. Lekin biz allaqachon Liga Kubogida zafar quchdik, Angliya Kubogi finaliga chiqdik va «Arsenal» bilan chempionlik uchun kurashyapmiz. Bizda hammasi yaxshi», — dedi Gvardiola matbuot anjumanida.
«Everton» — «Manchester Siti» uchrashuvi Toshkent vaqti bilan soat 00:00 da boshlanadi.
