«Манчестер Сити» бош мураббийи Хосеп Гвардиола Премьер-лига чемпионлик пойгаси авжига чиққан пайтда ўзини қандай ҳис қилаётгани ҳақида гапириб берди. «Шаҳарликлар» айни дамда «Арсенал»дан олти очко ортда қолмоқда, бироқ «канонирлар» иккита кўпроқ ўйин ўтказишган. Бугун «Сити» сафарда «Эвертон» меҳмони бўлади.

«Ҳозир ўйинларга тайёргарлик жараёнида ўзимни ўтган мавсумдагига қараганда анча хотиржам ҳис қиляпман. Бир йил олдин кунига 24 соат давомида Чемпионлар лигасига йўлланма ололмасак нима бўлиши ҳақида ўйлардим. Бу менга жуда қаттиқ таъсир қилганди. Қуйи лигага тушиб кетадиган жамоаларга қанчалик қийинлигини тасаввур қила оламан, чунки бу клубнинг молиявий ҳолати ва бошқа кўплаб омилларига бевосита таъсир қилади. Лекин биз аллақачон Лига Кубогида зафар қучдик, Англия Кубоги финалига чиқдик ва «Арсенал» билан чемпионлик учун курашяпмиз. Бизда ҳаммаси яхши», — деди Гвардиола матбуот анжуманида.

«Эвертон» — «Манчестер Сити» учрашуви Тошкент вақти билан соат 00:00 да бошланади.