Madridning «Real» klubi bosh murabbiyi Alvaro Arbeloa jamoaning gol o‘tkazib yubormagan o‘yinlar seriyasi tiklangani haqida gapirdi.
«Qaymoqranglilar» La Liganing 34-turi doirasida Vinisius Juniorning dubli evaziga «Espanyol» ustidan g‘alaba qozonishdi (2:0). Madridliklar uchun bu qariyb uch oy ichida chempionatdagi ilk «quruq» o‘yin bo‘ldi — jamoa ketma-ket o‘nta uchrashuvda o‘z darvozasi daxlsizligini saqlab qola olmayotgan edi.
«Hozirgina yonimdan Din Xyoysen o‘tib ketdi — u darvozamizdan to‘p olib chiqmaganimizdan juda xursand edi. Bu biz uchun gol o‘tkazib yubormaslik qanchalik muhim bo‘lganini ko‘rsatadi. Biz anchadan beri «quruq» o‘yin o‘tkazmagan edik. Nihoyat buning uddasidan chiqqanimizdan xursandman», — deya Arbeloaning so‘zlarini keltirmoqda The Touchline.
10 may kuni «Real» safarda «Barselona»ga qarshi maydonga tushadi.
