«Liverpul» yarim himoyachisi Dominik Soboslai «Manchester Yunayted»ga qarshi boy berilgan bahs (2:3) haqidagi fikrlari bilan o‘rtoqlashdi.
«Hissiyotlarim u qadar yaxshi emas, chunki uyga nol ochko bilan qaytyapmiz. Birinchi bo‘limdan keyin xursand bo‘lishga umuman asosimiz yo‘q edi. Ushbu uchrashuvdan faqat ikkinchi bo‘lim boshidagi o‘yinimizni o‘rnak sifatida olish mumkin, chunki aynan o‘sha yerda aslida kim ekanligimizni ko‘rsatdik», — deya futbolchining so‘zlarini keltirmoqda Sky Sports.
«O‘yindan oldin standart vaziyatlar haqida gaplashgandik, lekin aynan standartdan gol o‘tkazib yubordik. Shuningdek, qarshi hujumlardan ehtiyot bo‘lish kerakligini aytgandik, ikkinchi gol esa qarshi hujum natijasida sodir bo‘ldi. Biz diqqatni ko‘proq jamlashimiz kerak. Umid qilamanki, yakunda omad biz tomonda bo‘ladi».
Kelasi mavsum haqidagi savolga futbolchi shunday javob berdi:
«Birinchi navbatda, men diqqatimni kelasi mavsumga qaratganim yo‘q. Bor e’tiborim qolgan uchta o‘yinda, chunki hali erishishimiz kerak bo‘lgan narsalar ko‘p. Biz Chempionlar ligasida o‘ynashni xohlaymiz».
Ayni damda Arne Slot shogirdlari 58 ochko bilan to‘rtinchi o‘rinda borishmoqda. Zaxirasida bitta o‘yini bor «Aston Villa» hisobida ham shuncha ochko mavjud.
