«Liverpul» bosh murabbiyi Arne Slot APL 35-turidan o‘rin olgan «Manchester Yunayted»ga qarshi bahs yakunlari haqida to‘xtaldi. Uchrashuv mersisaydliklarning 2:3 hisobidagi mag‘lubiyati bilan yakunlandi.
«Biz raqibning kuchli tomonlarini nazorat qila olmadik. Biz bu jihatlarni bilardik, ulardan ikkitasi — standart vaziyatlar va qarshi hujumlardir. Birinchi golni standartdan o‘tkazib yubordik. Ikkinchi golga keladigan bo‘lsak, «Yunayted»ga qarshi o‘yinda maydonning qaysi qismida to‘pni yo‘qotish mumkin emasligini tushunish kerak», — deya Slotning so‘zlarini keltirmoqda Sky Sports.
«Biz 0:2 hisobini tenglashtirishga muvaffaq bo‘ldik, biroq odatda sodir bo‘ladigan holat takrorlandi — bir lahzaga diqqatni yo‘qotdik va shu zahoti gol o‘tkazib yubordik», — deya jamoa o‘yinidagi takroriy muammolarga e’tibor qaratdi mutaxassis.
Ushbu o‘yindan so‘ng «Liverpul» 58 ochko bilan turnir jadvalida to‘rtinchi o‘rinni egallab turibdi, «Manchester Yunayted» esa 64 ochko bilan uchinchi pog‘onaga joylashgan.
