Portugaliyaning «Portu» klubi vingeri Oskar Petushevski Angliya Premyer-ligasi grandlari e’tiboriga tushdi. Bu haqda Record nashri xabar bermoqda.

Manbaning so‘zlariga ko‘ra, 18 yoshli futbolchi uchun asosiy da’vogar sifatida «Liverpul» klubi ko‘rilmoqda. Biroq mersisaydliklar ushbu transfer borasida jiddiy raqobatga duch kelishlari mumkin — «Manchester Siti», «Manchester Yunayted» va «Nyukasl» klublari ham futbolchining harakatlarini diqqat bilan kuzatib bormoqda.

Petushevski joriy yilning yanvar oyida Polshaning «Yagelloniya» jamoasidan 8 mln yevro evaziga «Portu» safiga o‘tgan edi. Portugaliya klubi tarkibida u tez fursatda o‘zini ko‘rsatishga ulgurdi: chap qanot vingeri 14 ta uchrashuvda maydonga tushib, 5 ta golli harakatni (gol va assist) o‘z hisobiga yozdirib qo‘ydi.

Qayd etilishicha, «ajdarlar» iqtidorli futbolchisini arzonga qo‘yib yubormoqchi emas. Uning shartnomasidagi tovon puli (klausula) 60 mln yevro etib belgilangan.