«Liverpul» klubi «Yuventus»ning qiziqishlari doirasida bo‘lgan himoyachi bilan shartnoma imzolashga urinib ko‘radi.
Mashhur jurnalist Matteo Morettoning xabar berishicha, «Bornmut» markaziy himoyachisi Markos Senesi A Seriyaning bir nechta klublaridan kelgan takliflarni rad etgan holda Angliyada qolishga intilmoqda.
Qayd etilishicha, mersisaydliklar sport rahbariyati argentinalik futbolchiga allaqachon jiddiy qiziqish bildirgan va shu yozda uni erkin agent sifatida o‘z safiga qo‘shib olishga harakat qiladi. Yaqin vaqt ichida tomonlar o‘rtasida muzokaralar bo‘lib o‘tishi kutilmoqda.
Ma’lumot uchun, Markos Senesi joriy mavsumda «Bornmut» safida barcha musobaqalarda 36 ta o‘yin o‘tkazib, 5 ta golli uzatmani amalga oshirdi. Uning klub bilan amaldagi shartnomasi shu yilning iyun oyi oxirida yakuniga yetadi.
