«Ливерпуль» клуби «Ювентус»нинг қизиқишлари доирасида бўлган ҳимоячи билан шартнома имзолашга уриниб кўради.

Машҳур журналист Маттео Мореттонинг хабар беришича, «Борнмут» марказий ҳимоячиси Маркос Сенеси А Сериянинг бир нечта клубларидан келган таклифларни рад этган ҳолда Англияда қолишга интилмоқда.

Қайд этилишича, мерсисайдликлар спорт раҳбарияти аргентиналик футболчига аллақачон жиддий қизиқиш билдирган ва шу ёзда уни эркин агент сифатида ўз сафига қўшиб олишга ҳаракат қилади. Яқин вақт ичида томонлар ўртасида музокаралар бўлиб ўтиши кутилмоқда.

Маълумот учун, Маркос Сенеси жорий мавсумда «Борнмут» сафида барча мусобақаларда 36 та ўйин ўтказиб, 5 та голли узатмани амалга оширди. Унинг клуб билан амалдаги шартномаси шу йилнинг июнь ойи охирида якунига етади.