Madridning «Atletiko» klubi Chempionlar ligasi yarim finali doirasidagi javob o‘yini oldidan «Arsenal» muxlislarining xatti-harakatlari yuzasidan UYEFAga rasman shikoyat qildi. «Marca» nashrining xabariga ko‘ra, voqea tungi soat bir yarimlar atrofida sodir bo‘lgan.
Londonlik muxlislar «Atletiko» jamoasi joylashgan mehmonxona yaqinida feyerverklar otishgan. Ispaniya klubi vakillari begona shaxslarning shahar markazida joylashgan mehmonxona yaqiniga hech qanday to‘siqlarsiz yaqinlasha olganidan jiddiy norozilik bildirishdi. «Atletiko» rahbariyatining fikricha, bunday harakatlar xavfsizlik qoidalarini buzadi va jamoaning muhim o‘yin oldidan tayyorgarligiga salbiy ta’sir ko‘rsatadi.
Eslatib o‘tamiz, Londondagi javob uchrashuvi bugun, 5 may kuni Toshkent vaqti bilan tungi soat 00:00 da boshlanadi. Madridda o‘tgan birinchi o‘yinda jamoalar 1:1 hisobidagi durangga imzo chekishgan edi.
