Мадриднинг «Атлетико» клуби Чемпионлар лигаси ярим финали доирасидаги жавоб ўйини олдидан «Арсенал» мухлисларининг хатти-ҳаракатлари юзасидан УЕФАга расман шикоят қилди. «Marca» нашрининг хабарига кўра, воқеа тунги соат бир яримлар атрофида содир бўлган.

Лондонлик мухлислар «Атлетико» жамоаси жойлашган меҳмонхона яқинида фейерверклар отишган. Испания клуби вакиллари бегона шахсларнинг шаҳар марказида жойлашган меҳмонхона яқинига ҳеч қандай тўсиқларсиз яқинлаша олганидан жиддий норозилик билдиришди. «Атлетико» раҳбариятининг фикрича, бундай ҳаракатлар хавфсизлик қоидаларини бузади ва жамоанинг муҳим ўйин олдидан тайёргарлигига салбий таъсир кўрсатади.

Эслатиб ўтамиз, Лондондаги жавоб учрашуви бугун, 5 май куни Тошкент вақти билан тунги соат 00:00 да бошланади. Мадридда ўтган биринчи ўйинда жамоалар 1:1 ҳисобидаги дурангга имзо чекишган эди.