«Manchester Yunayted» muxlislarining bir qismi «Liverpul» bilan o‘yin oldidan Diogu Jotaning vafoti ustidan kulishdi.

3 may kuni «MYU» o‘z maydonida APLning 35-turi doirasida «qizillar»ni 3:2 hisobida mag‘lub etdi.

The Telegraph nashrining xabar berishicha, o‘yin oldidan «Yunayted» ishqibozlarining kichik bir guruhi «Liverpul» va Portugaliya terma jamoasining sobiq futbolchisi haqida haqoratli qo‘shiq kuylashgan. Eslatib o‘tamiz, Jota o‘tgan yozda akasi bilan birga YTH (avtohalokat) natijasida halok bo‘lgan edi.

Taxminan besh kishidan iborat guruh «Old Trafford» stadioniga qarab ketayotib, «Jota o‘ldi, xayr-xayr» deya hayqirishgan. Ushbu holat kameralarga muhrlangan. «MYU»ning boshqa muxlislari videodagi shaxslardan o‘zlarini uzoq tutishgan va klubni ularga o‘yinlarga tashrif buyurishni taqiqlashga chaqirishgan.

Keyinchalik, o‘yin davomida «Manchester Yunayted» muxlislarining ancha katta qismi 20-daqiqada «Liverpul» ishqibozlari tomonidan Jota xotirasiga bag‘ishlab boshlangan olqishlar daqiqasiga qo‘shilishdi.