«Манчестер Юнайтед» мухлисларининг бир қисми «Ливерпуль» билан ўйин олдидан Диогу Жотанинг вафоти устидан кулишди.

3 май куни «МЮ» ўз майдонида АПЛнинг 35-тури доирасида «қизиллар»ни 3:2 ҳисобида мағлуб этди.

The Telegraph нашрининг хабар беришича, ўйин олдидан «Юнайтед» ишқибозларининг кичик бир гуруҳи «Ливерпуль» ва Португалия терма жамоасининг собиқ футболчиси ҳақида ҳақоратли қўшиқ куйлашган. Эслатиб ўтамиз, Жота ўтган ёзда акаси билан бирга ЙТҲ (автоҳалокат) натижасида ҳалок бўлган эди.

Тахминан беш кишидан иборат гуруҳ «Олд Траффорд» стадионига қараб кетаётиб, «Жота ўлди, хайр-хайр» дея ҳайқиришган. Ушбу ҳолат камераларга муҳрланган. «МЮ»нинг бошқа мухлислари видеодаги шахслардан ўзларини узоқ тутишган ва клубни уларга ўйинларга ташриф буюришни тақиқлашга чақиришган.

Кейинчалик, ўйин давомида «Манчестер Юнайтед» мухлисларининг анча катта қисми 20-дақиқада «Ливерпуль» ишқибозлари томонидан Жота хотирасига бағишлаб бошланган олқишлар дақиқасига қўшилишди.