Londonning «Arsenal» klubi bosh murabbiyi Mikel Arteta Chempionlar ligasi yarim finali doirasida Madridning «Atletiko» jamoasiga qarshi kechgan javob uchrashuvi uchun tarkib tanlovi haqida to‘xtalib o‘tdi. «Kanonirlar» 1:0 hisobida g‘alaba qozonib, so‘nggi 20 yil ichida ilk bor finalga yo‘l oldi. Londondagi bahsning 44-daqiqasida Bukayo Saka tomonidan kiritilgan gol qarama-qarshilik taqdirini hal qildi.
«Tarkib tanlash juda qiyin bo‘ldi. Men turli variantlarni ko‘rib chiqdim, lekin yakunda ichki sezimimga tayanib, aynan shu tarkibda to‘xtash kerakligini his qildim. «Fulxem» bilan bo‘lgan avvalgi o‘yinda ko‘rganlarim menga juda ma’qul kelgandi. Muhim futbolchilarni asosiy tarkibdan tashqarida qoldirish doim qiyin — ularning barchasi maydonga ilk daqiqalardan tushishni istaydi», — dedi Arteta matbuot anjumanida.
