«Barselona» klubi jahon chempionati arafasida jarohat olgan vinger Lamin Yamalning salomatligidan xavotirda. 18 yoshli futbolchi mavsum yakuniga qadar safdan chiqdi, biroq bo‘lajak mundialning ilk o‘yinlarigacha tiklanishga ulgurishi kutilmoqda.
Diario Sport nashrining xabariga ko‘ra, Kataloniya klubi Ispaniya terma jamoasi vakillariga murojaat qilib, Yamalning holatini diqqat bilan kuzatib borishni va jahon chempionati oldidan uni zo‘riqtirmaslikni so‘ragan. «Qizil furiya» bosh murabbiyi Luis de la Fuente yosh yulduzni guruh bosqichi bahslarida faqat zaxiradan maydonga tushirishga va’da berdi.
Ispaniyaliklar 15 iyun kuni Kabo-Verdega qarshi o‘yin o‘tkazishadi, shundan so‘ng Saudiya Arabistoni (21.06) va Urugvay (27.06) terma jamoalari bilan to‘qnash kelishadi.
