Yaqindagina Nomzodlar turnirida g‘alaba qozonib, butun shaxmat olamini hayratda qoldirgan Javohir Sindarov hozirda Polshada Grand Chess Tour doirasida dunyo yulduzlariga qarshi dona surmoqda.

Javohirdan Nomzodlar turniridan keyin vaqtini qanday o‘tkazgani haqida so‘rashganda, u kutilmagan javobni berdi. Uning aytishicha, so‘nggi ikki hafta davomida shaxmatga umuman yaqinlashmagan va vaqtini ko‘proq Counter-Strike (CS) o‘ynash hamda boshqa ishlar bilan o‘tkazgan.

"Nomzodlar turniri odamni juda charchatib qo‘yadi, bor kuchingni oladi. Shuning uchun shunchaki miyani dam oldirish kerak edi. Polshadagi turnirga atigi ikki kun qolgandagina tayyorgarlik ko‘rishni boshladim".

Ushbu nufuzli musobaqadagi maqsadlari haqida gapirar ekan, Javohir o‘ziga ortiqcha bosim yuklamayotganini ta’kidladi. Uning uchun hozirgi asosiysi turnirda g‘olib chiqish emas, balki shunchaki o‘z darajasida, sifatli va chiroyli shaxmat ko‘rsatishdir.

Musobaqaning birinchi kuni yakunlari bo‘yicha hamyurtimiz o‘z o‘yinlaridan mamnunligini bildirdi. U dastlabki ikki partiyada g‘alabaga juda yaqin kelgani, lekin raqiblar ham kuchli himoyalanganini aytdi. Uchinchi o‘yinda esa biraz omad kulub boqib, g‘alaba qozonishga muvaffaq bo‘lgan:

"O‘yin davomida yutish qiyindek tuyulgandi, lekin yakunda g‘alaba qozondim. Birinchi kundan ko‘nglim to‘ldi".