Opta statistik kompaniyasi Angliya chempionati yakunlari bo‘yicha yangilangan prognozini taqdim etdi. Tegishli ma’lumotlar kompaniyaning rasmiy saytida e’lon qilindi.

Opta superkompyuteri tomonidan o‘tkazilgan hisob-kitoblarga ko‘ra, Londonning «Arsenal» klubi 86,35% imkoniyat bilan musobaqa favoriti bo‘lib turibdi. Oxirgi turda «Everton» bilan o‘yinda ochko yo‘qotgan «Manchester Siti»ning chempionlik imkoniyati esa 13,65% etib belgilandi.

Mikel Arteta shogirdlari 35 o‘yinda 76 ochko jamg‘argan holda APL turnir jadvalida peshqadamlik qilmoqda. Pep Gvardiola jamoasida 71 ochko bor va zahirada bitta o‘yin mavjud. Keyingi o‘rinda 64 ochko bilan «Manchester Yunayted» bormoqda, biroq ular allaqachon chempionlik uchun da’vogarlik qila olmaydilar.

Mavsum yakuniga qadar «Manchester Siti» «Brentford», «Kristal Pelas», «Bornmut» va «Aston Villa» bilan kuch sinashadi, shuningdek, klubni Angliya Kubogi finalida «Chelsi»ga qarshi o‘yin kutmoqda.

«Arsenal»ni esa «Vest Xem», «Byornli» va «Kristal Pelas»ga qarshi bahslar, shu bilan birga APL mavsumi yakunlanganidan keyin Chempionlar ligasi finali kutib turibdi.