Madridning «Real» klubi mashg‘ulotdagi mushtlashuvdan so‘ng yarim himoyachilar Federiko Valverde va Orelyen Tchuameni bilan xayrlashish niyatida emas. Bu haqda El Mundo nashri xabar bermoqda.

«Qirollik klubi» rahbariyati urugvaylik va fransiyalik futbolchilarga uzoq muddatli istiqbolda ishonch bildirmoqda. «Qaymoqranglilar» Valverde va Tchuamenini kelasi mavsumlarda jamoaning asosiy o‘yinchilari sifatida ko‘rishmoqda.

Eslatib o‘tamiz, futbolchilar o‘rtasidagi kelishmovchilik payshanba, 7 may kuni sodir bo‘lgan edi. Mushtlashuv paytida Federiko boshidan jarohat olgan va unga shifokor yordami talab etilgandi.

«Real» o‘zining navbatdagi uchrashuvini «Kamp Nou» stadionida «Barselona»ga qarshi o‘tkazadi. Bahs yakshanba, 10 may kuni bo‘lib o‘tadi.