«Manchester Siti» bosh murabbiyi Xosep Gvardiola Angliya Premyer-ligasining aprel oyi yakunlariga ko‘ra eng yaxshi murabbiyi deb topildi. Bu haqda tashkilot matbuot xizmati xabar bermoqda.
Aprel oyida «Manchester Siti» barcha uchta uchrashuvda g‘alaba qozondi. Jumladan, «Chelsi» ustidan yirik (3:0) hisobda zafar quchildi va «Arsenal»ga qarshi bahsda (2:1) muvaffaqiyatga erishildi. Bundan tashqari, «shaharliklar» «Byornli»ni kichik hisobda (1:0) mag‘lub etishdi.
Ayni damda Gvardiola shogirdlari Angliya chempionati turnir jadvalida 34 ta o‘yinda 71 ochko to‘plagan holda ikkinchi o‘rinni egallab turishibdi. Peshqadam «Arsenal»dan ortda qolish 5 ochkoni tashkil etadi, biroq «Manchester Siti»da zaxira o‘yini mavjud.
Ertaga, 9 may kuni «Manchester Siti» o‘z maydonida «Brentford»ni qabul qiladi. O‘yin Toshkent vaqti bilan 21:30da boshlanadi.
