«Manchester Yunayted» bosh murabbiyi Maykl Kerrik klubning transfer rejalari haqidagi savolga javob berdi. Murabbiyning o‘z kelajagi hozircha noaniq bo‘lib turibdi, uning shartnomasi yozda yakuniga yetadi. Shunga qaramay, jurnalistlar muntazam ravishda undan klubning uzoq muddatli rejalari haqida so‘rashmoqda.
«Muhokamalar doimiy ravishda olib borilmoqda. Yangi futbolchilarni sotib olish — muhim masala. Yoz yaqinlashgan sari odamlarni aynan shu mavzu qiziqtirishi tabiiy hol va buni tushunish mumkin. Ha, jiddiy ish olib borilmoqda va bu jarayon faqat menga bog‘liq emas», — dedi Kerrik shanba kungi «Sanderlend»ga qarshi o‘yin oldidan o‘tkazilgan matbuot anjumanida.
«Qizil iblislar» va «qora mushuklar» o‘rtasidagi bahs Toshkent vaqti bilan soat 19:00 da boshlanadi.
