Madridning «Real» klubi bosh murabbiyi Alvaro Arbeloa futbolchilar tomonidan unga nisbatan hurmatsizlik qilinayotgani haqidagi xabarlarga munosabat bildirdi.
Avvalroq, ba’zi futbolchilar murabbiy bilan muloqot qilmayotgani, hattoki unga haqoratli laqab o‘ylab topishgani haqida ma’lumotlar tarqalgan edi.
«Men odamlarning «futbolchilar menga nisbatan hurmatsizlik qildi» deb gapirishlariga yo‘l qo‘ymayman. Bunday holat bir marta ham sodir bo‘lmagan. Juda ko‘p yolg‘on gapirildi», — deya ta’kidladi Arbeloa jurnalistlarga.
«Real» o‘zining navbatdagi o‘yinini 10 may kuni «Barselona»ga qarshi o‘tkazadi. La Liga 35-turi doirasidagi ushbu bahs «Kamp Nou»da bo‘lib o‘tadi va Toshkent vaqti bilan tungi soat 00:00 da boshlanadi. Agar «qaymoqranglilar» g‘alaba qozona olishmasa, Xansi Flik jamoasi muddatidan oldin Ispaniya chempioniga aylanadi.
