«Yuventus» bosh murabbiyi Luchano Spalletti jamoa hujumchisi Lui Opendaning kam maydonga tushayotgani borasidagi savollarga javob berdi. Belgiyalik forvard turinliklarning so‘nggi 10 ta o‘yinidan 7 tasida maydonda ko‘rinish bermadi.

«Bu mening xatolarimdan biri. Openda mashg‘ulotlarda a’lo darajada ishlamoqda, u juda jiddiy futbolchi va jamoadoshlari uni yaxshi ko‘rishadi. U ko‘proq e’tiborga loyiq», — dedi mutaxassis matbuot anjumani chog‘ida.

Eslatib o‘tamiz, Openda 2025 yilning sentyabr oyidan buyon «Yuventus» sharafini himoya qilib kelmoqda. O‘shanda u «RB Leypsig»dan ijaraga olingan edi. Shu yilning aprel oyida Turin klubi 26 yoshli futbolchining transfer huquqini to‘liq sotib oldi va u bilan 2030 yilgacha mo‘ljallangan uzoq muddatli shartnoma imzoladi.

Joriy mavsumda belgiyalik hujumchi barcha musobaqalarda 37 ta o‘yinda ishtirok etib, o‘z hisobiga ikkita gol yozdirib qo‘ygan.