Londonning «Chelsi» klubi bosh murabbiyi vazifasini bajaruvchi Kalum Makfarleyn APLning 36-turi doirasida «Liverpul»ga qarshi kechgan bahs (1:1) natijasi yuzasidan o‘z fikrlarini bildirdi.

Uchrashuvning ikkinchi bo‘limi boshida bosh hakam Kreyg Pouson VAR tizimiga tayangan holda «ko‘klar»ning golini ofsayd sababli bekor qilgan edi.

«O‘yinning ayrim pallarida tashabbus u yoki bu tomonga o‘tib turdi. Balki fikrim biroz noxolis tuyular, lekin biz bu bahsda g‘alaba qozonishimiz mumkin edi. Bizda yaxshi imkoniyatlar bo‘ldi: birinchi bo‘limda Enso gol urishi mumkin edi, Kukurelya esa qanotda yaxshi harakat qilib, xavfli uzatmalarni amalga oshirdi. O‘yinda bahsli ofsayd va yaqqol penalti belgilanishi kerak bo‘lgan vaziyat ham bor edi. Menimcha, «Enfild»dan uch ochko bilan qaytishga loyiq edik», — deya Makfarleynning so‘zlarini keltirmoqda Football.London.

Ma’lumot uchun, ushbu durang orqali «Chelsi» chempionatdagi olti o‘yinlik mag‘lubiyatli seriyasiga chek qo‘ydi. Hozirda jamoa 49 ochko bilan turnir jadvalida 9-o‘rinni egallab turibdi. «Ko‘klar» navbatdagi o‘yinni 16 may kuni «Manchester Siti»ga qarshi o‘tkazishadi.