Parijning «PSJ» klubi rahbariyati va jamoa bosh murabbiyi Luis Enrike yangi shartnoma borasida kelishuvga yaqin kelishdi. Jurnalist Ben Jeykobsning xabar berishicha, yangi kelishuv to‘rt yilga mo‘ljallanadi.

Qayd etilishicha, rasmiy shartnoma mavsum yakunlanganidan so‘ng imzolanishi mumkin. Ayni damda ispaniyalik mutaxassis bor e’tiborini joriy mavsumdagi vazifalar, xususan, Fransiya chempionati va Chempionlar ligasidagi muvaffaqiyatli ishtirokka qaratgan.

55 yoshli Luis Enrike 2023 yildan buyon «PSJ»ni boshqarib kelmoqda. Uning amaldagi shartnomasi 2027 yilning yoziga qadar amal qiladi. Uning qo‘l ostida parijliklar uch bor Fransiya Superkubogi, ikki martadan mamlakat chempionati va kubogida zafar quchishdi. Shuningdek, jamoa uning boshqaruvida bir martadan Chempionlar ligasi va UYEFA Superkubogi g‘olibiga aylandi.

Ma’lumot uchun, Enrike muqaddam «Roma», «Selta» va «Barselona» klublarida, shuningdek, Ispaniya terma jamoasida faoliyat yuritgan. U «Barselona» bilan 2015 yilda trebl qayd etib, YECHLda g‘olib chiqqan edi.