«Barselona» yarim himoyachisi Gavi jamoasining joriy yilgi Chempionlar ligasidagi muvaffaqiyatsizligi borasida o‘z fikrlarini bildirib o‘tdi.

«Chempionlar ligasida g‘alaba qozonishga haddan tashqari e’tibor qaratmaslik kerak. Vaqti kelganda, biz bunga tayyor bo‘lamiz. Mavsumimiz esa ajoyib o‘tdi», — deya Gavining so‘zlarini keltirmoqda Movistar nashri.

Ma’lumot uchun, «Barselona» YECHLdagi yurishini chorak final bosqichida Madridning «Atletiko» jamoasiga imkoniyatni boy berib, yakunlagan edi. Turnirning final bahsi 30 may kuni bo‘lib o‘tadi va unda «PSJ» hamda «Arsenal» jamoalari bosh sovrin uchun kurash olib boradi.

Kataloniya klubi so‘nggi bor 2015 yilda Chempionlar ligasida g‘olib chiqqan. «Ko‘k-anorranglilar» hisobida jami 5 ta shunday kubok mavjud. Ushbu ko‘rsatkich bo‘yicha mutlaq rekordchi 15 ta sovrin bilan «Real Madrid» hisoblanadi.