Madridning "Real" klubi "Barselona" bosh murabbiyi Xansi Flikning otasi vafoti munosabati bilan hamdardlik bildirdi.

Germaniyalik mutaxassisning otasi yakshanba, 10 may kuni tongda olamdan o‘tdi. Oiladagi og‘ir judolikka qaramay, Flik bugun bo‘lib o‘tadigan "El-Klasiko" bahsini o‘tkazib yubormoqchi emas.

"Real" klubi, uning prezidenti va direktorlar kengashi "Barselona" murabbiyi Xansi Flikning otasi vafotidan chuqur qayg‘uda ekanliklarini ma’lum qildi. "Real" marhumning oila a’zolari va yaqinlariga o‘z ta’ziyasini bildiradi", — deyiladi Madrid klubi e’lon qilgan rasmiy bayonotda.

Bugun, yakshanba kuni Ispaniya La Ligasining 35-turi doirasida "Kamp Nou" stadionida "Barselona" va "Real" jamoalari o‘zaro to‘qnash kelishadi. O‘yin oldidan Flikning otasi xotirasi uchun bir daqiqalik sukut saqlanishi, kataloniyalik futbolchilar esa maydonga motam bog‘ichlari bilan tushishi kutilmoqda.

Ma’lumot uchun, "ko‘k-anorranglilar" ayni damda 88 ochko bilan turnir jadvalida peshqadamlik qilmoqda. 77 ochkoga ega "qaymoqranglilar" esa ikkinchi pog‘onada bormoqda. Agar "Barselona" bo‘lajak bahsda mag‘lubiyatga uchramasa, muddatidan oldin chempionlikni rasmiylashtiradi.