Мадриднинг "Реал" клуби "Барселона" бош мураббийи Ханси Фликнинг отаси вафоти муносабати билан ҳамдардлик билдирди.
Германиялик мутахассиснинг отаси якшанба, 10 май куни тонгда оламдан ўтди. Оиладаги оғир жудоликка қарамай, Флик бугун бўлиб ўтадиган "Эл-Класико" баҳсини ўтказиб юбормоқчи эмас.
"Реал" клуби, унинг президенти ва директорлар кенгаши "Барселона" мураббийи Ханси Фликнинг отаси вафотидан чуқур қайғуда эканликларини маълум қилди. "Реал" марҳумнинг оила аъзолари ва яқинларига ўз таъзиясини билдиради", — дейилади Мадрид клуби эълон қилган расмий баёнотда.
Бугун, якшанба куни Испания Ла Лигасининг 35-тури доирасида "Камп Ноу" стадионида "Барселона" ва "Реал" жамоалари ўзаро тўқнаш келишади. Ўйин олдидан Фликнинг отаси хотираси учун бир дақиқалик сукут сақланиши, каталониялик футболчилар эса майдонга мотам боғичлари билан тушиши кутилмоқда.
Маълумот учун, "кўк-анорранглилар" айни дамда 88 очко билан турнир жадвалида пешқадамлик қилмоқда. 77 очкога эга "қаймоқранглилар" эса иккинчи поғонада бормоқда. Агар "Барселона" бўлажак баҳсда мағлубиятга учрамаса, муддатидан олдин чемпионликни расмийлаштиради.













